Тулаан айдыҥ 26-чы кӱнинде Оҥдой јурттыҥ культура байзыҥыныҥ одожында алтай калыктыҥ сӱӱген ле јаантайын сакып, амадап уткыган Јылгайак байрамы ӧтти. Байрамда аймактыҥ тӧс јуртыныҥ эл-јоны келген јерлештерле, ӧскӧ јурттардаҥ ла аймактардаҥ келген айылчыларла кожо јараш ойын — концертти кӧрӱп, ойындарда, кӧрӱ-конкурстарда туружып, казандарда азылган эт-кӧчӧноҥ амзап, амыралта кӱнди бийик кӱӱн-санаалу ӧткӱрдилер.
Байрамныҥ кӧдӱриҥилӱ ачылтазында туружаачыларын ла кӧрӧӧчилерди Оҥдой јурттыҥ администрациязыныҥ јааны Сынару Бабыкова, Эл Башчы Мерген Теркин ле аймактыҥ башкарузыныҥ культура, спорт ло јашӧскӱримле иштеер бӧлӱгиниҥ јааны Тамара Якова тӧргӧ чыгып, јылдыҥ тӱгенгениле, јастыҥ келгениле, Алтайыстыҥ ар-бӱткени тереҥ уйкудаҥ ойгонгоныла акту-кӱӱнинеҥ уткыдылар.
Мынаҥ ары јараш алтай кожоҥдор ло бијелер байрамныҥ учына јетире тӱгенбей, јурттыҥ ичине јаҥыланып, Јылгайактыҥ туружаачыларыныҥ, кӧрӧӧчилериниҥ ле арткан эл-јонныҥ кӱӱн-санаазын кӧдӱрди.
Байрамныҥ программазы аайынча бир-канча кӧрӱ-конкурстар ӧткӧн: кеп кийимниҥ ле тулуҥныҥ кееркедим јарандырар эдимдериниҥ, наадайлардыҥ јӱзӱндериниҥ, алтай аш-курсактыҥ, чӱмдемел-кееркедим кеендиктиҥ эдимдериниҥ, кокырчы Тастаракайлардыҥ маргааны ла оогош болчомдордыҥ јилбилӱ ойындары ӧтти.
Спорттыҥ бӱдӱмдериле бу јылда эки маргаан ӧткӱрилген – камчы согуш ла алтай кӱреш. Эҥ кӧп кӧрӧӧчилер јууган кӱрештиҥ маргаанында абсолютный јеҥӱчил болуп Оҥдой јурттаҥ Панов Эжер чыкты. Бу маргаанда ого чыдаары табылбады. Бойыныҥ бескелеринде јеҥӱчилдер деп адаткан алыптар – Яприн Чечен, Едикеев Эзен ле ол ло Панов Эжер. Камчы согушла јеҥӱчил болуп Озочинов Эзен адатты.
Јылгайак байрамныҥ ончо кӧрӱлериниҥ ле спорттыҥ маргаандарыныҥ туружаачылары талдама сыйларла, Быйанду бичиктерле кайралдаткан. Аштаган-чылаган, ајару јок арткан айылчы кижи кӧрӱнбеди. Байрамды бойыныҥ бийик кеминде ӧткӱрерге јурттыҥ администрациязы албаданган, јаан болужын јетирген улус – јербойыныҥ аргаачылары ла Оҥдой јурттыҥ улузы.
Ажуда